Хэдхэн цагийн дараа он солигдох гэж байна. Шог зураач С.Цогтбаяртай холбогдож, баярын энэ өдрийн сэтгэгдлийг нь хуваалцлаа.
-Та саяхан Япон яваад ирсэн?
-Харумафүжи их аварга, зураач С.Заяасайхан нарын хамтарсан “Хоёр ертөнц” үзэсгэлэн Гинза дүүргийн Ничида хэмээх алдартай галерейд болсон юм. Энэ үзэсгэлэнд очиж урилгаар оролцоод ирсэн. Их аварга, зураач Заяасайхан хоёрын хамтарсан үзэсгэлэн сайхан болж өнгөрсөн.
-Та шинэ жилийн баяраа хэрхэн тэмдэглэх гэж байна вэ?
-Гэр бүлийнхээ хүрээнд тэмдэглэнэ дээ. Шинэ жилийн орой телевизээр гоё нэвтрүүлгүүд үзээд гэртээ дулаахан сайхан байх дуртай. Залуу байхад бол шинэ жилийн баяраар найз нөхөдтэйгээ наргиж сайхан тэмдэглэдэг байсан. Одоо гэртээ хүүхдүүдтэйгээ бужигнаж тэмдэглэх дуртай болсон.
Ирэх оны уран бүтээлийн төлөвлөгөөгөө гаргав уу?
-Ер нь нүүдэлчин хүмүүс нэг их айхавтар холын юм төлөвлөж чаддаггүй. Мэдээж уран бүтээлээ үргэлжлүүлж хийнэ. Ойрд номоо гаргаагүй, тиймээс номоо гаргах төлөвлөгөө бий.
-Манай уншигчдад шинэ жилийн мэндчилгээ дэвшүүлнэ үү.
-Ирж буй шинэ он та бүхэнд эрүүл энх, аз жаргал, санасан сайн сайхан бүхнийг авчрах болтугай гэж ерөөе.
