Монгол Улсын 25 дахь Ерөнхий сайд С.Баяр, 28 дахь Ерөнхий сайд Ч.Сайханбилэг нарыг батлан даалтад гаргах, эсвэл үргэлжлүүлэн хорих эсэх шүүх хурал өчигдөр Баянзүрх, Сүхбаатар, Чингэлтэй дүүргийн шүүхэд болох байсан ч хойшлогдож өнөөдөр 15 цагт хуралдахаар болсон. Эх сурвалжийн мэдээлж буйгаар хурал дөнгөж сая эхэлсэн байна.
Дөнгөж сая Баянзүрх, Сүхбаатар, Чингэлтэй дүүргийн шүүхээс Ерөнхий сайд асан Ч.Сайханбилэгийг батлан даалтад гаргаж, хилийн хориг тавих прокурорын хүсэлтийг хэлэлцэж шийдвэрээ гаргалаа. Тодруулбал прокурорын хүсэлтийг хангаж, Ч.Сайханбилэгийн таслан сэргийлэх арга хэмжээг өөрчилж, хязгаарлалт тогтоолоо. Ингэснээр түүнд хилийн хориг тавьж гадуур байцаахаар болж байна. Ч.Сайханбилэгийн хувьд одоо сайд нарын хоёрдугаар эмнэлэгт хэвтэн эмчлүүлж байгаа билээ. С.Баярын таслан сэргийлэх арга хэмжээг мөн л өөрчилж, хязгаарлалт тогтоож гадуур байцаах шийдвэрийг Баянзүрх, Чингэлтэй, Сүхбаатар дүүргийн шүүхээс гаргалаа. Тэдний биеийн байдалтай холбоотойгоор ийм шийдвэр шүүхээс гаргасан талаар өмгөөлөгчид нь сэтгүүлчдэд мэдээлсэн юм.