Олон улсын эдийн засгийн форумын үеэр “Роснефть” компани Монголын “НИК” компанитай газрын тосны бүтээгдэхүүнийг таван жилээр нийлүүлэх гэрээг үзэглэсэн байна. Гэрээнд “Роснефть” компанийн ерөнхийлөгч И.Сечин, “НИК” компанийн Гүйцэтгэх захирал С.Алтанцэцэг нар гарын үсэг зуржээ.
Энэ үеэр ОХУ-ын Ерөнхийлөгч В.Путин байлцсан байна. ОХУ-ын Санкт-Петербург хотноо байгуулсан тус гэрээгээр нийт 1.3 тэрбум ам.долларын өртөг бүхий 1.2 сая тонн газрын тосны бүтээгдэхүүнийг энэ оны зургаадугаар сараас эхлэн 2019 оны тавдугаар сарыг хүртэл хугацаанд нийлүүлэхээр болжээ. “Роснефть” компанийн ерөнхийлөгч И.Сечин “Гэрээг эцсийн хэрэглэгчидтэй шууд байгуулж байгаа нь талуудын хувьд гэрээний эдийн засгийн ач холбогдлыг улам нэмэгдүүлнэ” гэж онцлолоо.
Мөн “Монгол Улсын зах зээл цаашид нэлээд хэмжээгээр өсөн нэмэгдэх боломжтой. Иймээс “Роснефть” компани энэ зах зээлд баттай байр сууриа олж авах нь чухал юм. Үүнээс гадна “Роснефть” компани цаашид ч Монголын түншүүдтэйгээ харилцан ашигтай хамтын ажиллагааг өргөжүүлэхээр зорьж байна” гэв. “Роснефть” компанийн хувьд манай улсын газрын тосны бүтээгдэхүүний хэрэгцээний 80 хувийг хангахаар тооцоолж байгаа аж.