Ногоон хот, иргэний оролцоо зөвлөгөөн өнөөдөр болж байна. Тодруулбал, Тэрбум мод үндэсний хөдөлгөөнийг нийслэлд зохион байгуулах ажлын хүрээнд төр, хувийн хэвшил, шинжлэх ухаан, олон улсын байгууллага болон иргэдийн 200 гаруй төлөөлөл тус зөвлөгөөнд оролцсон юм. Энэхүү санаачилгын хүрээнд 2030 он хүртэл нийслэлийн хэмжээнд 120 сая мод тарьж ургуулахаар төлөвлөсөн гэдгийг салбарын төлөөлөл онцлов. Зөвлөгөөний үеэр дурдсан тоон мэдээллийг танилцуулъя.
Нийслэлийн байгаль орчны газраас гаргасан тоо баримтаас үзвэл, Улаанбаатар хотын хэмжээнд ой мод үржүүлгийн чиглэлээр 100 гаруй аж ахуйн нэгж үйл ажиллагаа явуулдаг. Эдгээр байгууллагууд өнөөдрийн байдлаар 4.6 сая тарьц суулгацын нөөц байна гэсэн тооцоо бий.
Нийслэлийн Засаг даргын ногоон хөгжил болон агаар, орчны бохирдлыг бууруулах асуудал хариуцсан орлогч П.Баттөр “Улаанбаатар хотын хэмжээнд сүүлийн хоёр жилд 100 орчим га талбайд 135 мянган ширхэг мод тарьж суулгасан байгаа юм. Энэхүү нөөц боломж хөрөнгө оруулалтынхаа хэмжээг 100 дахин нэмэгдүүлснээр 17 мянган га талбайг 2030 онд бүрэн ойжуулах тооцоо гарч байна. Өөрөөр хэлбэл, одоогийн хүн хүчний нөөц, хөрөнгө оруулалтынхаа түвшнийг хамгийн багадаа 100 дахин нэмэх хэрэгцээ шаардлага тулгарч байгаа гэсэн үг” хэмээн мэдээлэв. Мөн тэрбээр “Уур амьсгалын өөрчлөлтийн эсрэг үндэсний хорооноос мод тарих технологи, ургуулах арга ухааныг заах сургагч багш хөтөлбөрийг хэрэгжүүлэхээр төлөвлөж байна. Энэ хүрээнд нийслэл хотын хороо бүрээс иргэдийг оролцуулж сургагч багш бэлтгэхээр төлөвлөж байгаа” гэсэн юм.