Өнөөдөр “Оюутан Эргүүл” арга хэмжээний нээлт боллоо. Тус арга хэмжээг Сүхбаатар дүүрэг дэх цагдаагийн нэгдүгээр хэлтэс зохион байгуулж байгаа бөгөөд тус дүүргийн 1-8 дугаар хороонд үйл ажиллагаа явуулж буй ШУТИС, МУИС, МУБИС, Үндэсний биеийн тамирын дээд сургууль, Түшээ дээд сургууль, Олон улс судлалын дээд сургуулийн оюутан залуус хамрагдсан аж.
Эдгээр их дээд сургуулиуд өөрсдийн нутаг дэвсгэрт амар тайван, эрүүл, аюулгүй орчныг бүрдүүлэх, гэмт хэрэг, нийгмийн хэв журмын зөрчлөөс урьдчилан сэргийлэх ажилд дэмжлэг үзүүлэх үндсэн зорилготой юм байна. “Оюутан эргүүл”-д хамрагдаж буй оюутан нь хичээлийн бус цагаар буюу чөлөөт цагаараа өдөрт дөрвөн цаг ажиллана. Ажилласан хугацаанд сургууль дээр ямар зөрчил гарч байгааг цагдаагийн алба хаагчдад мэдээллэх үүрэгтэй аж.