“Дэлхийн цом”-ын тэмцээнээс ОУХМ Ц.Мөнхзул РИО-2016 олимпийн эрхээ авчээ.
Тэрбээр Азербайжаны Габала хотод болж байгаа буудлагын тэмцээнээс 584 оноогоор финалд шалгарч, улмаар хагас финалд 13 оноо авснаар 6-р байр эзлэн олимпийн эрхээ авсан байна.
Харин 50 метрийн сонгомол гар бууны эрэгтэй дасгалд 56 тамирчин буудсанаас ОУХМ Э.Даваахүү 549 оноогоор 37-р байранд оржээ. Түүнчлэн 25 метрийн спорт гар бууны эмэгтэй дасгалд 85 тамирчин буудаж, Хөдөлмөрийн баатар О.Гүндэгмаа 578 оноогоор 20-р байранд, ОУХМ Ө.Өлзийням 559 оноогоор 73-р байранд тус тус бичигдэв.
Рио-2016 олимпийн эрх олгох сүүлчийн “Дэлхийн цом”-д 90 орны 1100 бууч цэц мэргээ сорьж байна. Монголын багийн хувьд Гавьяат тамирин О.Гүндэгмаа, ОУХМ Э.Даваахүү, ОУХМ Ч.Нарантуяа нарын 10 тамирчин оролцож байгаа бөгөөд цомын тэмцээн энэ сарын 14-нд дуусна.
Монголын буудлагын тамирчдаас ийнхүү Гавьяат тамирчин О.Гүндэгмаа, Г.Нандинзаяа, Ц.Мөнхзул нарын гурван тамирчин 2016 оны олимпийн наадамд өрсөлдөх эрхээ аваад байна.