Босогчдын хяналтад байгаа Сирийн Алеппо хотын дүүргүүдэд Оросын нисэх онгоцууд сүүлийн өдрүүдэд улам хүчтэй цохилт өгч байна гэж идэвхтнүүд мэдэгдэв.
Наад зах нь 25 хүн амиа алдсан ба тэдний дунд хүүхдүүд байна.
Сирийн Засгийн газар Алеппо хотын зүүн хэсгээс иргэдийг гаргахын тулд түр хугацаагаар гал зогсоохыг уриалсан билээ. Үүний дараахан бөмбөгдөлт эхэлсэн байна.
АНУ болон ОХУ-ын зуучлалаар байгуулсан гал зогсоох тохиролцоо тасалдсаны дараа Алеппо хотод агаарын цохилтын ажиллагаа улам эрчимжсэн билээ.
ОХУ-ын Ерөнхийлөгч Владимир Путин Францад хийх гэж байсан айлчлалаа цуцалсны дараа агаарын цохилт эхэлсэн байна. Тэрбээр энэ сард Францын Ерөнхийлөгч Франсуа Олландтай уулзах байсан боловч тэдний уулзалт Сирийн асуудлаар хязгаарлагдана гэж Франц мэдэгдсэнтэй холбоотойгоор В.Путин айлчлалаа цуцалсан гэж Францын Ерөнхийлөгчийн төлөөлөгч мэдэгдэв.
Харин Францын Ерөнхийлөгч даваа гарагт мэдэгдэл хийхдээ, ОХУ-ын албаны хүмүүс Алеппо хотыг бөмбөгдсөнтэй холбоотойгоор дайны гэмт хэрэг үйлдсэн хэрэгт холбогдож магадгүй гэсэн байна.