Өмнөд Африкийн Бүгд Найрамдах улсаас шуудангаар дамжуулан их хэмжээний хар тамхийг Монгол Улсын нутаг дэвсгэрт оруулж ирсэн хэргийг Цагдаагийн ерөнхий газрын Хар тамхитай тэмцэх газраас илрүүлэн, мөрдөн шалгах ажиллагаа явуулж байгаа талаар мэдээллээ.
Хар тамхитай тэмцэх газрын ахлах мэргэжилтэн, цагдаагийн ахмад н.Зоригбаатар “2021 оны наймдугаар сарын 11-ны өдөр Өмнөд Африкийн Бүгд найрамдах улсаас 989.2 грамм буюу их хэмжээний метафетамин буюу мөс гэдэг бодисыг улсын хилээр нэвтрүүлсэн гэмт хэргийг илрүүлэн шалгаж байна. Тус гэмт хэрэгт Чингэлтэй дүүрэгт оршин суух Б, Баянзүрх дүүрэгт оршин суух хаягтай Э нарыг холбогдуулан шалгаж байна. Иргэн Э-д өнөөдөр таслан шийтгэх арга хэмжээ авсан. Тухайн этгээд урьд нь Хонконгод хар тамхи, мансууруулах бодисыг зөөвөрлөсөн хэргээр 10 жилийн хорих ял эдлээд 2020 онд суллагдаад Монгол Улсад ирээд байжээ. Гол захиалагч хүнийг баривчилж, саатуулсан. Хар тамхийг Монгол Улс руу захиалсан байж болзошгүй хүмүүсийг мөн шалгаж байна” гэв.
Мөн он гарсаар хар тамхитай холбоотой 76 гэмт хэрэгт 143 хүнийг холбогдуулан шалгаж байгаа аж.