Монголын баг тамирчид олимпийн наадмаас анхны медаль хүртсэний 50 жил, алтан медаль хүртсэний 10 жилийн түүхт ой 2018 онд тохиож байгаа билээ. 1968 онд Мексикийн нийслэл Мехикод болсон зуны XIX олимпийн их наадмаас Монголын чөлөөт бөхийн тамирчид болох хөдөлмөрийн баатар, гавьяат тамирчин Ж.Мөнхбат мөнгө, ардын багш, гавьяат тамирчин Ч.Дамдиншарав, Д.Сэрээтэр, гавьяат тамирчин Т.Артаг нар хүрэл медаль хүртэж, Монголын баг тамирчдын олимпийн медалийн буухиаг эхлүүлсэн түүхтэй. МҮОХ-ноос олимпоос медаль хүртсэний түүхт 50 жилийн ойг тохиолдуулан өчигдөр “Мехико-1968” олимпийн наадамд оролцсон тамирчдаа хүлээн авч, хүндэтгэл үзүүлэв.
“Мюнхен-1972” олимпийн мөнгөн медальт, хөдөлмөрийн баатар, гавьяат тамирчин Х.Баянмөнх, “Мехико-1968” олимпийн хүрэл медальт, ардын багш, гавьяат тамирчин Ч.Дамдиншарав, Д.Сэрээтэр нар оролцсон. Түүнчлэн гавьяат дасгалжуулагч Т.Мягмаржав, ОУХМ Д.Норолхоо, ОУХМ Амарсанаа нар хүрэлцэн ирж оюутан, тамирчин залуустай Мехикогийн олимпийн наадамд оролцсон түүхэн дурсамжаа хуваалцан, үнэтэй зөвлөгөө өгч, халуун дотно яриа өрнүүллээ.