Чөлөөт бөхийн “Шахтерская Слава” эрэгтэйчүүдийн олон улсын уламжлалт тэмцээн энэ сарын 22-23-нд ОХУ-ын Кемерово хотын “Кузбасс” спортын ордонд боллоо.
Тэмцээнд Монгол, ОХУ, АНУ, Армени, Беларусь, Болгар, БНХАУ, Герман, Казахстан, Канад, Румын, Унгар, Украин, Узбекистан, Литва, Латви, Польш, Словак, Финланд, Энэтхэг, Эстони гэсэн 21 орны 186 тамирчин эрэгтэйчүүдийн найман жинд өрсөлдөв. Тав дахь удаагийн тэмцээнд манай улсаас зургаан тамирчин хүч үзсэнээс 86 кг-ын жинд Үндэсний шигшээ багийн тамирчин, “Алдар” спорт хорооны бөх, ОУХМ Оргодолын Үйтүмэн хүрэл медаль хүртлээ. Тэрбээр Кемеровогийн дэвжээнд эзэн орны Дмитрий Екименког 13:1-ээр, Красноярскийн Александр Зеленковыг 9:0-ээр, Узбекистаны Икром Бохомуродовыг 10:0-ээр тус тус ялсан ч хагас шигшээд Германы Ахмед Дударовт 5:7-гоор ялагдсан. Харин хүрэл медалийн төлөөх барилдаанд Кемеровогийн Иван Костеринийг 8:4-өөр ялж, энэ жилийн “Уурхайчдын цом”-оос Монголын багийн цорын ганц медалийг авчирлаа. Тус тэмцээнд манай улсаас өмнө нь Гавьяат тамирчин П.Өнөрбат 2014 онд мөнгө, ОУХМ Н.Золбоо 2014, ОУХМ Д.Цогтбаатар, Д.Гомбодорж 2015, гавьяат тамирчин Э.Ням-Очир 2016 онд хүрэл медаль хүртэж байжээ.
Тэмцээний 61 кг-д өрсөлдсөн Азийн АШТ-ий хүрэл медальт, оюутны дэлхийн аварга ОУХМ Т.Түвшинтулга шагналт тавдугаар байрт орсон юм. Тэрбээр “Сингапур-2010” залуучуудын олимпийн аварга Буриадын Алдар Бальжинимаевыг 3:1-ээр, Эрхүүгийн Антон Евдокимовыг 11:1-ээр, 2013 оны ДАШТ-ий мөнгөн медальт, Азийн аварга Энэтхэгийн Амит Кумарыг 2:1-ээр тус ялсан ч хагас шигшээд Буриадын Юлиан Гергеновт 0:10-аар, хүрэл медалийн төлөөх барилдаанд Якутын Айхаан Антоновт 2:4-өөр ялагдав.
Харин 65 кг-д хүч сорьсон спортын мастер Ч.Жамсранжав Кемеровогийн Бобуржон Абдусаматовыг 7:5-аар ялсан ч 1/8 шигшээд тус тэмцээнд хүрэл медальт Хакасиягийн Алексей Медведевт 0:6-гаар ялагдсан бол 70 кг-д спортын мастер Ц.Чингэс эхлээд Кемеровогийн Никита Куклинийг 4:4-ээр ялсан ч энэ жингийн дэд аварга Чечений Алибек Акбаевт 0:7-аар ялагдсан байна. Дагах барилдаанд Ц.Чингэс эзэн орны Миличенког 5:4-өөр ялсан ч удаах барилдаанд хүрэл медалийн эзэн АНУ-ын Томми Грантад 6:9-өөр дийлдсэн юм.
Тэмцээний 97 кг-д ОУХМ Л.Төртогтох өрсөлдсөн. Тэрбээр 1/8 шигшээд эзэн орны Владимир Калашниковыг 5:1-ээр ялсан ч хагас шигшээд Анзор Уришевт 0:3-аар, дагах барилдаанд Румыны Влад Клачад оноогоор цэвэр (0:10) ялагдлаа. Харин 125 кг-д хүч үзсэн залуу тамирчин О.Мөнх-Эрдэнэ 1/8 шигшээд АНУ-ын Майк Косоуд 5:6-гаар, дагах барилдаанд Латвийн Дмитрис Михайловсод ялагдсанаар тэмцээнээ дуусгажээ.