Өнөөдөр гурван намын нэр дэвшигчдийн мэтгэлцээнийг аль телевиз дээр явуулах вэ гэдэг тал дээр саналын зөрүүтэй байгаа талаар АН-ын Ерөнхий нарийн бичгийн дарга О.Магнай сэтгүүлчдэд мэдээлэл хийлээ.
Тэрбээр ярихдаа “Өнөөдөр сонгуулийн сурталчилгааны өдөр байгаа. Монгол Улс 21 аймаг 9 дүүрэгтэй. Сонгуульд нэр дэвшигч маань 45 гаруй удаа эмч, багш зэрэг сонгогчидтой уулзах төлөвлөгөөтэй байгаа. Манай дэвшигч эрх баригчидтай адил онгоц байхгүй, бүх газар машинаар явж байгаа. Дээрээс нь мэтгэлцээнийг хаана хийх вэ гэдэг тал дээр санал зөрөлдсөн.
Манай байр суурь бол “Монгол HD” телевиз дээр мэтгэлцээнийг явуулах санал тавьсан. Монголын үндэсний телевиз бол эрх баригчдын гар хөл болсон телевиз. Тиймээс энэ телевизээр мэтгэлцээн хийхгүй. “Монгол HD” телевиз дээр хийнэ гэсэн байр суурин дээрээ хатуу байгаа. Энэ телевиз иргэдэд илүү бодитой мэдээлэл өгнө гэж бодож байгаа. Бусад хоёр намын мэтгэлцээн зохион байгуулагчидтай уулзсан. Мэтгэлцээнийг зохион байгуулах тухай ярилцсан. Гол нь аль сувгаар гаргах вэ гэдэг дээр зөрүүтэй байгаа. АН-аас нэр дэвшигч Х.Баттулга УИХ-ын гишүүнээр гурван удаа сонгогдсон, Засгийн газрын гишүүн байсан улс төрч хүн. Мэтгэлцээнээс айж ичих зүйл байхгүй, ямар ч сэдвээр ярихад бэлэн байгаа гэдгийг хэлэх гэсэн юм” гэв.
Үүний дараа сэтгүүлчийн асуултад хариулав.
-Гурван удаа мэтгэлцээн явуулахыг яагаад танай тал зөвшөөрөхгүй байгаа гэсэн ?
-Телевизээ сонгочихвол хэдэн ч удаа мэтгэлцэхэд бэлэн байна. Хамгийн гол нь аль сувгаар явуулах нь л чухал. Нөгөө талаас МҮОНТ болон ТВ-9 телевизээр явуулъя гэсэн санал тавьсан. Ардчилсан намын байр суурь бол “Монгол HD” телевиз гэдэг дээр хатуу байгаа.
–Хөтлөгчийн тал дээр ямар байр суурьтай байгаа вэ?
-Хөтлөгчийн хувьд бас анхаарах ёстой. Монголд намч бус байр суурьтай сайн хөтлөгчид олон байгаа байхаа гэж найдаж байна.
О.ӨНӨР