2022 оны 01 дүгээр сарын 24-ний 08 цагаас 2022 оны 01 дүгээр сарын 31-ний 08 цаг хүртэлх 7 хоногийн цаг агаарын тойм:
Хур тунадас: 24-нд баруун аймгуудын нутгийн хойд, говийн аймгуудын нутгийн зүүн хэсэг, төв болон зүүн аймгуудын ихэнх нутгаар, 25-нд төвийн аймгуудын нутгийн зүүн хэсэг, зүүн аймгуудын нутгийн зарим газраар, 26-нд зүүн аймгуудын нутгийн зүүн хэсгээр, 28-нд баруун аймгуудын нутгийн зарим газраар, 29-нд баруун аймгуудын нутгийн зүүн, говийн аймгуудын баруун хэсэг, төвийн аймгуудын нутгийн зарим газраар, 30-нд төвийн аймгуудын нутгийн зүүн өмнөд, зүүн аймгуудын нутгийн өмнөд хэсэг, говийн аймгуудын ихэнх нутгаар, 31-нд нутгийн зүүн өмнөд хэсгээр цас орж, 7 хоногийн нийлбэр тунадасны хувьд хамгийн их нь Сүхбаатарын Дарьгангад 3.2мм, Дорноговийн Өргөнд 2.6мм, Сэлэнгийн Хүдэр, Төв аймгийн Дэлгэрхаан, Өвөрхангайн Зүйл, Сүхбаатарын Наран, Онгон, Баяндэлгэр, Дундговийн Дэрэн, Дорноговийн Улаан-уулд 2.0-2.5мм, бусад нутгаар 0.0-1.9мм цас орсон байна. 27-нд нийт нутгаар нутгаар цас ороогүй.
Цасны зузаан: Өнөө өглөөний 08 цагийн цаг уурын өртөө, харуулын цасны зузааны мэдээгээр баруун, төв болон зүүн аймгуудын ихэнх нутаг, говийн аймгуудын нутгийн зүүн хэсгээр 1-26 см зузаан цасан бүрхүүл тогтосноос хамгийн их нь Увсын Малчинд 26 см, Хөвсгөлийн Ренчинлхүмбэд 18 см, Сэлэнгийн Бугантад 17 см, Баян-Өлгийн Даян, Увсын Баруунтуруун, Завханы Тосонцэнгэл, Хөвсгөлийн Цагаан-Үүрд 15 см, бусад хэсгээр 1-14 см зузаан цасан бүрхүүл тогтсон байна.
Агаарын хамгийн их температур: Ихэнх хугацаанд хүйтний эрч чангарч Увс нуур болон Дархадын Хотгор, Идэр, Тэс голын хөндийгөөр 26-32 градус, Их нууруудын хотгор, Завхан голын эх, Алтай, Хангай, Хөвсгөлийн уулархаг нутаг, Хүрэнбэлчир орчмоор 19-25 градус, Орхон, Сэлэнгэ, Хараа, Ерөө, Туул, Тэрэлж, Хэрлэн, Онон голын хөндийгөөр 14-19 градус, говийн бүс нутгийн өмнөд хэсгээр 2-8 градус, бусад нутгаар 9-14 градус хүйтэн байв.
Агаарын хамгийн бага температур: Хүйтний эрч чангарч Увс нуур, Их нуурууд болон Дархадын хотгор, Завхан голын эх, Идэр, Тэс голын хөндийгөөр 40-46 градус, Алтай, Хангай, Хөвсгөл, Хэнтэйн уулархаг нутаг, Хүрэнбэлчир орчим, Байдраг, Хараа, Ерөө, Туул, Тэрэлж, Хэрлэн, Онон, Улз голын хөндийгөөр 30-39 градус, цас багатай газар болон говийн бүс нутгийн баруун өмнөд хэсгээр 12-18 градус, бусад нутгаар 20-26 градус хүйтэн байв.
Cалхи: Ихэнх хугацаанд салхи секундэд 5-10 метр, говь,тал хээрийн нутгаар секундэд 12-14 метр, зарим үед түр зуур 18 м/с хүрч ширүүссэн байна.
Улаанбаатар хот орчмоор:
Хур тунадас: 24, 26, 29-нд нийслэл орчмоор 0.0-0.4 мм цас орсон. Бусад хугацаанд цас ороогүй.
Агаарын температур: Хүйтний эрч чангарч Шөнөдөө Яармаг-Сонгины орчмоор 30-34 градус, бусад хэсгээр 20-26 градус, өдөртөө 11-16 градус хүйтэн байв.
Салхи: Ихэнх хугацаанд салхи секундэд 5-10 метр байв.