Засгийн газраас дотоодын үйлдвэрүүдээ дэмжих үүднээс энэ жилээс ноос самнаж ээрч боловсруулан эцсийн бүтээгдэхүүн хийж буй үйлдвэрүүдэд урамшуулал олгохоор болоод байна.
МАА-н гаралтай бүтээгдэхүүнийг нэмэгдүүлэх зорилгоор хонь, тэмээний ноос бэлтгэн дотоодын боловсруулах үйлдвэрүүдэд нийлүүлж буй малчдад ноосны урамшуулал олгож байгаагаас гадна ноосоор эцсийн бүтээгдэхүүн хийж буй үйлдвэрүүдэд урамшуулал олгож Засгийн газраас бодлогоор дэмжихээр болоод байна. Энэ талаар Монголын Ноосон бүтээгдэхүүн үйлдвэрлэгчдийн холбооны гүйцэтгэх захирал М.Эрдэнэбат, хонины ноос тэмээний ноосыг угааж эцсийн бүтээгдэхүүн гаргах ААН-үүдэд урамшуулал олгох шийдвэр гарсан. Тиймээс дунд шатанд ноос угааж самнаж ээрч боловсруулж буй ААН-үүд боловсруулалтандаа анхаарч, үйлдвэрлэгчид эцсийн бүтээгдэхүүн гаргахдаа үнийн хувьд зах зээлд нийцсэн, худалдан авах чадварт уялдсан нэмүү өртөг бүтээхэд анхаарах хэрэгтэй байна гэв.
Манай улс жилд дунджаар нийт 24 мянган тонн хонины ноос бэлтгэж үндэсний үйлдвэрүүд хагас болон бүтэн боловсруулж, гадаад болон дотоод зах зээлд бүтээгдэхүүн нийлүүлж байна.
Тодруулга: Манай улс 2010 онд баталсан “Монгол мал” хөтөлбөрийн хүрээнд МАА-н гаралтай түүхий эдийг нэмэгдүүлэх зорилгоор 2011 оноос МАА-гаралтай түүхий эдийг үндэсний үйлдвэрлэлд тушаахад урамшуулал олгож байхаар тогтсон юм. 2025 он гэхэд түүхий эдийн 80 хувийг боловсруулж эцсийн бүтээгдэхүүн үйлдвэрлэж, ноос, ноолуурын салбарыг Монгол Улсын экспортын тулгуур салбар болгохоор зорьж байна.