БНХАУ-ын хамгийн чинээлэг эрхмээр нэрлэгдээд байсан Жон Шаншаны хөрөнгийн хэмжээ Мукеш Амбаниг давж, Азид тэргүүллээ.
Түүний хөрөнгө энэ онд 70.9 тэрбум ам.доллароор өсөж, 77.8 тэрбум ам.доллар болсон байна. Улмаар хөрөнгөө богино хугацаанд өсгөсөн үзүүлэлтээр дээд амжилт тогтоолоо. Одоогоор тэрбээр “Bloomberg”-ийн тэрбумтнуудын индексэд Азид нэгдүгээрт, дэлхийд 11 дүгээрт бичигдэж байна.
Жон Шанша одоогоор хоёр компани эзэмшдэг. Вакцин үйлдвэрлэдэг “Beijing Wantai” компани нь дөрөвдүгээр сард IPO хийсэн бөгөөд үүнээс хойш хувьцааны ханш нь 2000 гаруй хувиар өссөн байна. Мөн цэвэр усны “Nongfu Spring” компанийн хувьцааны ханш 155 хувиар өсөөд байгаа аж.