Энэ удаагийн танин мэдэхүйгээр алсын удирдлагатай, нисгэгчгүй автомат онгоцыг сонголоо. General Atomics Aeronautical Systems-ийн үйлдвэрлэсэн нисгэгчгүй анхны онгоц 1994 оны долдугаар сард нислэгээ хийж байжээ. 1995 онд үйлдвэрлэгдсэнээс одоог хүртэл 360 онгоц угсраад байгаа юм байна. Төслийн өртөг нь 2.38 тэрбум доллараар эхэлж нэг ширхгийн үнэ 4.03 сая доллараар үнэлэгддэг байна.
General Atomics MQ-1 Predator нисгэгчгүй онгоцыг олон улсад (UAV) гэж нэрлэдэг. Америкийн General Atomics компани бүтээсэн бөгөөд Америкийн нисэх хүчинд ашигладаг. 1990-ээд оны эхээр танилцуулагдсан бөгөөд тэрнээс хойш тасралтгүй хөгжиж, ашиглагдаж байна. Анхны загварууд нь камер болон бусад ганц нэг сенсор (мэдрэгч) зөөх төдий байсан бол өнөөдөр хоёр ширхэг AGM-114 Hellfire пуужингаар тоноглогдож байлдааны ажиллагаа хүртэл явуулах чадвартай болжээ. 1995 оноос хойш даалгавар биелүүлж Афганистан, Пакистан, Босни, Серби, Ирак, Йемен, Ливи, Сири, Сомали зэрэг олон оронд ашиглагдаж байна. Rotax хөдөлгүүртэй, сэнсээр ажилладаг байна. 400 nmi (460 nmi нь 740 км) зайд 14 цаг хүртэл нисэж бааз руугаа буцаж ирж дөнгөдөг гэнэ. 2001 оноос эхлэн RQ-1 нь гол нисгэгчгүй онгоц болж ашиглагдсан бөгөөд Афганистан, Пакистанд олон даалгаврыг амжилттай биелүүлсэн. Энхийн зорилгын хүрээнд хил орчмын эргүүл хийх, салхи, цаг агаарын хүнд орчинд шинжилгээ судалгаа явуулах, маш том талбайг хамарсан түймэр зэрэг гамшгийн үед зураг видео авах зорилгоор ашиглагдаж байна.
Одоогоор Япон даатгалын компани автомашины ослын мэдээллийг цуглуулахын тулд бага оврын нисгэгчгүй онгоц ашигладаг байна. “Sompo Japan Nipponkoa” даатгалын компани уг үйлчилгээг энэ оны гуравдугаар сараас явуулж эхэлсэн аж. Уулын энгэр, далайн гадарга зэрэг хүн хүрэхэд хэцүү газруудын бичлэгийг энэхүү онгоцоор хийх бүрэн боломжтой гэдгийг албаны хүмүүс мэдээлжээ. Уг нисгэгчгүй онгоцыг хоёр хүнээс бүрдэх баг удирдан ажиллуулдаг байна.Осол болсон газрын зургийг бүрэн авах асуудал ажилтнуудад тулгардаг бөгөөд уг төхөөрөмжийг ашигласнаар богино хугацаанд бүх мэдээллийг цуглуулах боломжтой болсон гэж тус компанийн зүгээс онцолж буй юм.