Улаанбаатар хотын Захирагчийн ажлын албанаас нийслэл хотод тогтсон борооны усыг соруулах ажлыг хийж гүйцэтгэжээ.
Тодруулбал, Дарь эхийн зам, Бөмбөгөр худалдааны төвийн урд зам, Улаанбаатар төмөр зам, вокзал орчмын ус, Улсын Их дэлгүүрээс хойшхи гудамж, Урт цагааны гудамжийн эвдэрч муудсан, борооны ус ихээр тогтдог явган замыг засч, Нарны гүүрний хойд талд тогтсон усыг тус тус соруулжээ.
Мөн Нарын гүүрний доод талын замд их хэмжээний ус тогтосноос шугамд суулт өгч цөмөрсөн байдалтай байна. Хотын Ерөнхий менежер болон хэлтсийн дарга нар бөглөрсөн ус зайлуулах шугамнуудад авч буй шуурхай арга хэмжээнүүдэд хяналт тавин ажиллажээ. Тус байршилд цөмрөлт үүссэн газруудыг яаралтай шороогоор дүүргэн дахин нягтруулах үүрэг өгчээ.
Улаанбаатар хотын гол гудамжуудын явган хүний замын эвдрэл гэмтлийг засч янзлах, нөхөн сэргээх ажлын хүрээнд Хот нийтийн аж ахуйн зардлаас хөрөнгийг шийдвэрлэн Баруун сэлбийн гудамж буюу Улсын их дэлгүүрээс хойш чиглэл, Жуулчины гудамж буюу Урт цагааны замын урд талыг нөхөн сэргээж, шинээр тавих ажлыг хийжээ.