Идэр есийн хүйтэн өнөөдрөөс эхэлж байна. Есөн есийг давчихвал урин цагтай золгоно. Аргын тооллын арванхоёрдугаар сарын 22-ны өдрөөс эхний ес нь тоологддог билээ. Нэг есөд нэрмэл архи хөлдөнө гэж монголчууд эртнээс хүйтний эрчийг харьцуулсара ирсэн уламжлалтай. Өнөө жилийн өвөл өнтэй сайхан байгаа болохоор өнөөдөр ес эхэлсэн гэхэд тэнгэр хангай харьцангуй тогтуун байна.
Гэхдээ ойрын өдрүүдэд зарим нутгаар өдөртөө -20-25 хэм, шөнөдөө 30-35 хэм хүрч хүйтрэх төлөвтэй байгаа ажээ. Өнөөдрөөс Хөвсгөл, Булган, Сэлэнгэ, Баянхонгор, Дорноговь, Сүхбаатар аймгийн нутгаар цас орж, явган шуурга шуурах юм байна.
Түүнчлэн Увс, Завхан, Говь-Алтай аймгийн ихэнх нутгаар цас их унаж, цасны зузаан 20-30 см хүрсэн байна. Бэлчээрийн даацаас хамаарч нийт нутгийн 30 орчим хувьд буюу Сүхбаатар, Хэнтий, Архангай, Говьсүмбэр аймгуудын ихэнх сум, Хөвсгөл, Увс аймгийн хойд хэсгийн сумдаар өвөлжилт хүндрэх төлөвтэй байгаа аж.
Нийслэл хотын хувьд бямба, ням гариг хүртэл цас орохгүй. Цаг агаар харьцангуй тогтвортой байх нь ээ.