Нээлттэй Засгийн түншлэлийн 2016-2018 оны “Үйл ажиллагааны үндэсний төлөвлөгөө”-ний төслийг хэлэлцэж, санал авах зорилгоор зохион байгуулж байгаа тус хэлэлцүүлэгт Засгийн газрын Хэрэг эрхлэх газрын дэд дарга, Нээлттэй засгийн түншлэлийн Үндэсний зөвлөлийн дэд дарга Г.Ганболд оролцож, “Нээлттэй Засгийн түншлэл ба Монгол Улс” сэдвийн хүрээнд танилцуулга хийлээ.
Засгийн газраас Нээлттэй Засгийн түншлэлийн 2016-2018 оны “Үйл ажиллагааны үндэсний төлөвлөгөө”-г энэ сард багтаан батлан гаргахаар ажиллаж байна. Манай улс Нээлттэй Засгийн түншлэлд 2013 онд нэгдэн орсон бөгөөд 2014-2016 оны Үйл ажиллагааны нэгдсэн төлөвлөгөөний хэрэгжилтийн тайлан, хөндлөнгийн үнэлгээг хэлэлцэн дүгнэсэн. Тус түншлэл нь дэлхийн 69 орныг эгнээндээ нэгтгэсэн, иргэдийн оролцоог дэмждэг, авлигын эсрэг тэмцдэг, хариуцлагатай Засгийн газар болж дэвжихэд гишүүн орнууддаа тусладаг олон улсын хамтын ажиллагаа юм. Өнгөрсөн төлөвлөгөөний хугацаанд Засгийн газрын 11-11 төвийг байгуулан үйл ажиллагааг тогтмолжуулж, Шилэн дансны тухай хуулийг батлан мөрдөж эхэлсэн нь төрийн үйлчилгээг сайжруулж, иргэдийн оролцоог нэмэгдүүлэхэд чухал ач холбогдолтой ажил болсон гэж Нээлттэй Засгийн түншлэл дүгнэлээ гэж Засгийн газрын Хэрэг эрхлэх газрын дэд дарга Г.Ганболд хэллээ.
Нээлттэй Засгийн түншлэл олон нийтийн нээлттэй хэлэлцүүлэгт оролцогчид төрийн үйлчилгээг сайжруулах, төрийн шударга ёсыг нэмэгдүүлэх, үндэсний баялаг, нөөцийн үр дүнтэй удирдлага, аюулгүй нийгмийг цогцлоох, компанийн хариуцлагыг нэмэгдүүлэх гэсэн таван бүлэгт хуваагдан 2016-2018 оны Үйл ажиллагааны үндэсний төлөвлөгөөнд саналаа өглөө гэж Засгийн газрын Хэвлэл мэдээлэл, олон нийттэй харилцах албанаас мэдээллээ.