Плэй-оффын эхний шатны тоглолтууд дуусаж хоёрдугаар шатанд оролцох багуудын нэрс тодорлоо. Энэ жилийн плэй-офф сүүлийн жилүүдийг бодвол өрсөлдөөнтэй болж байгааг мэргэжилтнүүд онцолж байгаа билээ.
Цувралуудын үр дүн
Өрнөд бүсийн тэргүүн баг Хьюстон Рокетс, Минесато Тимбэрволвэсийг 4-1-ийн харьцаатай буулган авав. Тус цувралд пуужингуудын лидэр Жэймс Хардэн дийлдэшгүй байж залуу чононуудын хариу үйлдэл бүрийг няцааж багаа дараагийн шатанд гаргасан юм.Тэрээр энэ жилийн үнэ цэнэтэй тоглогчийн шагналд хүчтэй өрсөлдөж байгаа билээ.
Харин тэдний хоёрдугаар шатны өрсөлдөгч Юта Жазз, Оклахома Сити Тандэрийг 4-2-ийн харьцаатай буулган авсан юм. Тэд жигд бүрэлдхүүнтэй аянгануудын эсрэг өрсөлдөж улмаар ялсан. Ялангуяа шинэ тоглогч Донавон Мичелийг онцлох хэрэгтэй. Тэрээр чухал мөч бүрт хэрэгтэй оноо авалтуудыг авч байсан юм. Мөн шилдэг хамгаалан тоглогчид нэр дэвшигч Рүди Гобэр, холбон тоглогч Рики Рүбио, улирлын дундуур морьтон цэргүүдээс ирсэн Жэй Кроудэр нарыг Жаззаас онцлох хэрэгтэй. Тэдний хамгаалалт, довтолгоо Тандэрийн их гурвалыг ажиллагаагүй болгож байв.
Өнөөдөр өглөө Хьюстон Рокетс, Юта Жазз багуудын цувралын эхний тоглолт боллоо. Тоёота цэнтрт болсон энэхүү тоглолтод талбайн эзэн Жэймс Хардэн мөн л шилдэг тоглолтоо үзүүлж 41 оноо түүв. Харин эсрэг багаас Донавон Мичель 21 оноо авсан ч жулдан 110-96-гийн харьцаатай Хьюстон Рокетсчууд цувралыг 1-0-ээр тэргүүлж эхэллээ.
Өмнө жилийн аварга баг Голдэн Стэйт Варриорс, Сан Антониа Спүрсийг 4-1-ийн харьцаатай ялжээ. Тус цуврал эхлэхийн өмнө Спүрсчүүд нилээдгүй асуудалтай байсан бөгөөд плэй-оффт орох үгүй нь тодорхойгүй байв. Багийн лидэр Кавая Лионард плэй-оффт орох үгүй нь эргэлзээтэй, дасгалжуулагч Грегг Попович гэр бүлийн асуудалтай байсан юм. Улмаар алтан мужийн дайчид багийн лидэр Стефан Көрригүй ч цувралд илүүрхэж чадлаа.
Харин аваргуудтай өрсөлдөх Нью Орлэанс Пэликансчууд Портланд Триал Блэйзэрсийг нэг ч хожигдолгүй шүүрдэв. Тэдний гарааны тавт болох Ражон Рондо, Жрү Холидэй, Этуан Мүүр, Никола Миротич, Энтони Дэвис нар гайхалтай хамтран тоглолт үзүүлж байгааг дурьдах хэрэгтэй. Харамсалтай мэдээ нь Пэликанс багийн шилдэг тоглогч Дэмаркуз Казинсийн улирал нь дууссан байгаа билээ.
Өчигдөр Голдэн Стэйт Варриорс, Нью Орлэйнс Пэликанс багуудын цувралын эхний тоглолт болсон юм. Энэхүү тоглолтод ноднин жилийн аваргууд тоглолтын турш илүүрхэж цувралыг тэргүүлж эхэллээ. Кэвин Дурант, Клэй Томпсон нарыг дайчдаас онцлох хэрэгтэй. Тэд нийлээд 53 оноог тус тоглолтод авсан юм.
Харин дорнод бүсийн шилдэг баг Торонто Рэпторс, Вашингтон Визардсчуудыг 4-2-ын харьцаатай буулган авлаа. Дэмар Дэрозан, Кайл Лаури тэргүүтэй канадын баг багаараа жигд тоглож улирлын турш контендэр баг гэдгээ батлан шилдэг тоглолт үзүүлж байсан билээ.Харин нийслэл хотын баг учраа ололгүй явсаар эхний шатнаас плэй-оффыг орхив.
Харин тэдний өрсөлдөгч Клэвланд Кавальерсчууд Индиана Пэйсэрстэй тулж хүнд хэцүү долоон тоглолтын эцэст өнөө өглөө дараагийн шатанд орох эрхээ өвөртөллөө.Тус цувралд морьтон цэргүүдийн лидер Лэброн Жэймсийг онцлохгүй байхын аргагүй тоглосон.33 настай довтлогчийн хувьд олон олон рекорд амжилтуудыг эвдсэн жил болж байна. Тэрээр багийн хамт нэг хоног амраад 31-ны өглөө Торонто Рэпторсын залуучуудтай хоёрдугаар шатны эхний тоглолтоо хийх билээ./cdn.vox-cdn.com/uploads/chorus_image/image/59564961/952761806.jpg.1524971308.jpg)
Багийн лидер Кайри Ирвингийн эзгүйд Бостон Сэлтикс хоёрдугаар шатанд шалгарлаа. Тэд Милуаки Баксын эсрэг долоон тоглолт хийсэн бөгөөд хүнд хэцүү цувралд дасгалжуулагч Брэд Стивэнсийн ур ухаанаар амжилт олсон юм. Мөн Бостоны Ал Хорфорд, Тэрри Розьер, Жэйсон Тэйтум, Жэйлон Браун гэх залуусыг онцлохгүй байхын аргагүй байлаа. Харин бугануудаас залуу од Гианнис Антэтокумпо чадах бүхнээ хийсэн ч ялагдал хүлээж улирлаа өндөрүүлэв. Тэрээр дараа улиралд илүү эрч хүчтэй эргэж ирэх тоглогчдын нэг билээ.
Харин Бостон Сэлтиксийн эсрэг тоглох Филадэлфа 76-чууд Миами Хитийг дөрвөн тоглолтод бут ниргэсэн. Эрч хүчээ нөхсөн 76-гийн залуус Бостон Сэлтиксийн хамгийн хүнд өрсөлдөгчид байх нь дамжиггүй. Жоэл Эмбийд, Бэн Симмонс тэргүүтэй залуус энэ жилийн плэй-оффд өнгөтэй байгаа билээ.
Үндэсний сагсанбөмбөгийн лигийн плэй-оффын халуухан цувралуудын талаарх мэдээллийг манай сайт цаг алдалгүй мэдээллэх болно.
Б.АМАРТҮВШИН
