Нийгмийн ардчилал Монголын залуучуудын холбооноос яг одоо Уул уурхайн яамны гадна тэмцэл хийж байна. Тэдний зүгээс өнгөрсөн долоо хоногт шинээр томилогдсон Г.Тэмүүлэн тэргүүтэй удирдах зөвлөлдөө зургаан шаардлага хүргүүлсэн юм. Эдгээрийн шаардлагын хариуг НАМЗХ-ны удирдах зөвлөлийнхөн, ялангуяа Г.Тэмүүлэн одоог хүртэл өгөөгүй байна. Тиймээс өнөөдөр шаардлагынхаа хариуг авахаар Уул уурхайн яамны гадна цуглажээ.
Сануулбал, тус холбооны хувьд 7 дугаар бага хурал нь талцал, хуваагдалд орлоо гэх мэдээлэл гарч байсан. Гэсэн ч нэгдсэн байр сууринд хүрсэн хэмээн ойлгож Л.Оюун-Эрдэний холбооны ерөнхийлөгчийн бүрэн эрхийг сэргээсэн гэж мэдээлсэн. Мөн Ерөнхий нарийн бичгийн даргаар Уул уурхайн дэд сайд Г.Тэмүүлэнг сонгон Их хурал зохион байгуулах ажлын хэсэг байгуулагдсан гэдгийг хэлж байна. Гэвч Ерөнхий нарийн бичгийн даргаар томилогдсон Г.Тэмүүлэнг албан тушаалаа урвуугаар ашиглан их хурал болохоос өмнө аймаг, орон нутгийн хурлыг өөрт ашигтайгаар зохион байгуулахыг завдах зэргээр өмнө нь үүссэн маргааныг улам даамжруулан, орон нутгийн НАМЗХ-ныхны байдлыг хүндрүүлэх, нэгдсэн байр сууринд хүрсэн байсныг улам сөрөг уур амьсгалд оруулж байгааг удирдах зөвлөлийн гишүүд нь шүүмжилсээр байгаа юм.