Нийслэлийн Налайх дүүргийн 8 хорооны гэр хорооллын 7226 айл өрхөд сайжруулсан шахмал түлш хэрэглэх бэлтгэлийг эхлүүлээд байна.
Учир нь 2022 онд тус дүүргийг агаарын чанарыг сайжруулах бүсэд шинээр оруулж байгаа юм.
Налайх дүүргийн ЗДТГ, нийслэлийн Агаар, орчны бохирдолтой тэмцэх газар, Таван толгой түлш ХХК-ийн Хэрэглэгчид үйлчлэх алба, нийслэлийн МХГ-ын Агаарын чанарын хяналтын хэлтэс, Налайх дүүргийн ОБХ-ийн хамтарсан ажлын хэсэг Налайх дүүрэгт ажиллажээ.
Агаарын тухай хуулийн 15.1-т “Төрийн захиргааны төв байгууллага нь нутгийн захиргааны байгууллагатай хамтран агаарын бохирдлыг багасгахаар агаарын чанарыг сайжруулах бүсийг тогтоож, тухайн бүсэд мөрдөх журмыг батална”, 15.3-т “нийслэлийн Агаарын чанарыг сайжруулах бүсийг жил бүр шинэчлэн тогтооно” гэж заасан байдаг аж.