Тулгар төрийн 2226 жил, Их Монгол Улс байгуулагдсаны 811 жил, Ардын хувьсгалын 96 жилийн ой, Үндэсний их баяр наадамд хууль, дүрмийн дагуу даатгуулсан, 18-аас дээш насны хүчит 512 бөх барилдана. Энэ жилийн наадамд барилдах бөхчүүдийг энэ сарын 9, 10-ны өдрийн 10:00-18:00 цагт Монгол бөхийн өргөөнд бүртгэх аж. Уг бүртгэлд бөхчүүд хоёр хувь цээж зураг, даатгалын төлбөр, иргэний болон цолны үнэмлэхээ авчирч, өөрийн биеэр бүртгүүлэх гэнэ. Харин зарласан хугацаанд бүртгүүлээгүй бөхчүүдийг нэмж бүртгэхгүйг албаныхан санууллаа.
Мөн улсын баяр наадмын өсвөрийн 128 бөхийн барилдаанд барилдах 14-15 насны хөвгүүдийг энэ сарын 8, 9-ний өдрийн 10:00-18:00 цагт Монгол бөхийн өргөөнд бүртгэхээр болсон байна. Өсвөрийн барилдаанд 2001 оны нэгдүгээр сарын 1-нээс хойш төрсөн хөвгүүд барилдах юм. Бүртгүүлэхдээ иргэний үнэмлэх, төрсний гэрчилгээ, эрүүл мэндийн даатгалын болон Хүний хөгжлийн сангийн дэвтэр, хоёр хувь цээж зураг, даатгалын төлбөрөө тус тус авч очихыг анхааруулав.
Б.УРАН