Тив, дэлхийн олон тэмцээнд эх орныхоо нэрийг мандуулсан МУГТ Н.Төгсцогтыг мэргэжлийн бокст орох нь гэсэн мэдээлэл үе, үе гарах болсон. Тэрээр өнгөрсөн хавар нэг сар АНУ-д амьдарч мэргэжлийн боксын спорттой танилцаж, судлаад ирсэн. Өнгөрсөн хугацаанд энэ талаар ямар нэгэн хариулт өгөөгүй ч “Мэргэжлийн бокс миний мөрөөдөл. Цаашдаа мэргэжлийн рингэнд тоглоно гэж боддог. Наана нь Олимпийн аварга болох зорилтыг өөртөө тавьсан” хэмээн ярилцлагадаа дурдаж байсан юм. Мөн АНУ-ын хоёр ч компани, мэргэжлийн боксын менежерүүд санал тавьсан талаар ярьсан билээ.
Солонгос улсад болсон “Инчён 2014” Азийн наадамд шүүгчдийн луйвраар харамсалтайгаар ялагдсан тэрээр өдгөө Лос Анжелест байгаа. Лос Анжелест дасгалжуулагч Joe Goossen-ны удирдлаган дор бэлтгэл сургуулилтаа хийж байгаа аж. Харин энэ талаар Монголын боксын холбооны хэвлэл мэдээллийн ажилтан Ц.Батнасан сарын өмнө “Азийн наадамд Н.Төгсцогт луйвардуулсан нь АНУ-д мэргэжлийн бокст хүч сорих нэгэн шалтгаан болсон байх. Гэхдээ албан ёсоор бидэнд мэргэжлийн бокст хүч үзэхээр боллоо гэсэн мэдээлэл өгөөгүй байгаа” гэсэн тайлбарыг өгч байлаа. МУГТ Н.Төгсцогт мэргэжлийн бокст хүч үзэх эсэх нь тодорхойгүй байсаар өнөөдрийг хүргэсэн. Тэрээр шинэ он гарсан даруйд мэргэжлийн бокс тоглох үнэмлэхээ гардаж авснаар дээрх бүх асуултууд хариулт өгч байна.