Нийгмийн даатгалын үндэсний зөвлөл өнөөдөр анхдугаар хуралдаанаа хийлээ. Хурлаар элэгний С вирусын эмийн дүнд хөнгөлөлт үзүүлэх хувь хэмжээг тогтоожээ. Тодруулбал, элэгний С вирусын эсрэг таван эмэнд 210 мянган төгрөгийн хөнгөлөлт үзүүлэхээр шийдвэрлэжээ. Ингэхдээ тодорхой эмийн сангуудад үйлчлэх юм байна. Хөдөлмөр, Нийгмийн хамгааллын сайд Н.Номтойбаяр “Нэгдүгээр сард хуралдах Нийгмийн даатгалын үндэсний зөвлөлдөх хурлаар ажлын явцыг танилцуулна. Мөн өвлийн улиралд утаа ихсэж байгаа учраас 0-5 насны хүүхдүүд ханиад, томуугаар өвчлөх нь нэмэгдэж байна. Тиймээс 0-5 настай хүүхдүүдийн хэрэглэх 10 гаруй нэр төрлийн эмийг 100 хувь хөнгөлөх шийдвэр гаргалаа.
Эмийн хөнгөлөлт 500 орчим сая төгрөг болох юм. Мөн хэвтэн эмчлүүлэхэд 100 хувь эмчилгээний зардлаас чөлөөлнө. Энэ бүхэнд нийт 1.5 тэрбум төгрөг зарцуулна. Мөн Нийгмийн даатгалын чөлөөт мөнгөн үлдэгдлийн талаар ярилцлаа. Одоогийн байдлаар 557 тэрбум төгрөг арилжааны банкуудад есөн хувийн хүүтэй байршиж байна. Гэтэл Монголбанк 15 хувийн бодлогын хүү тогтоосон. Зургаан хувийн зөрүү байна. Хуурамчаар бичиг баримт бүрдүүлж, тэтгэврийн мөнгө авч байна.
Тэтгэврийн зээлтэй ахмадууд нас барсан тохиолдолд тэтгэврийн сангаас өгч байгаа тэтгэвэр нь зогсох ёстой байтал үргэлжлэн олгогдож байна. Энэ мэт луйврын шинж чанартай үйл ажиллагаа гарч байгаа учраас тэтгэвэр тогтоолгох аянгаа улсын хэмжээнд явуулна. Мөн Ажилгүйдлын даатгалын сангийн орлогоос төвлөрсөн 114 тэрбум төгрөг байна. Ирэх онд 38 орчим тэрбум төгрөгийг ажилгүйдлийн даатгалд олгоно.