Олон улсын оюуны спортын “Элит наадам” Хятадын Хуай-Ан хотноо маргааш эхэлнэ. Энэхүү наадам шатар, даам, го даам, бриж, хятад шатрын төрлөөр зохиогдох бөгөөд шагналын сан нийт 200.000 евро юм. Мөн бүх оролцогчийн тээвэр, байр, хоолны зардлыг зохион байгуулагчид бүрэн хариуцаж байгаа юм.
Даамын төрөлд дэлхийн цомын тэмцээнээс шалгарсан 24 эрэгтэй, 20 эмэгтэй тоглогч оролцож байна. Энэ удаад манай улсаас ДДХМ Насанбаярын Мөнхтуяа шилдэг 20-д багтсан байна. Тэмцээн рапид буюу түргэн тоглолтын төрлөөр эхлэх ба Н.Мөнхтуяа эхний өрөгтөө дэлхийн 15 удаагийн аварга Зоя Голубеватай оноолт таарчээ.
Н.Мөнхтуяа нь 2000 онд Голланд улсад зохиогдсон Дэлхийн залуучуудын аварга шалгаруулах тэмцээнээс анхны мөнгөн медалийг эх орондоо авч ирж байсан Монгол Улсын зургаан удаагийн аварга тамирчин юм.