Өнөөдөр 12:00 цагт Сүхбаатарын талбайд болсон “Оффшорчдын эсрэг цуглаан” дээр МАХН-ын дарга Н.Энхбаяр гарч ирж үг хэллээ. Үүнийг Ерөнхийлөгчийн сонгуулийн сурталчилгаагаа эхлүүллээ хэмээн зарим хүмүүс харж байна.
Тэрбээр хэлэхдээ, “Би Солонгосоос ирлээ. Солонгост хээл хахууль авсан хүмүүсээ албан тушаалаас нь огцруулаад шүүх хуулийнх нь байгууллага шударга ажиллаж байна. Солонгос Улс сэрсэн байна. Дэлхий сэрсэн байна. Гэтэл бид унтаад л байх уу, дарлуулаад л байх уу, айгаад л байх уу. Өнөөдөр би энд үг хэлье гэж бодоогүй. Гэхдээ сүүлийн жилүүдэд та бүхний дунд хутгалдаж амьдарч байгаа учраас хаана манай ард түмэн зовж байна би байж байх ёстой гэж ирсэн юм. Би тугийг нь ч барьж ирсэн, тугалыг нь ч хариулж байсан. Ард түмнийхээ өмнө буруу юм хийсэндээ уучлалт гуйсан байгаа. Бусад нь ч гэсэн уучлал гуйгаарай. Оффшорт хэний ч мөнгө байсан хувааж авчраад ядуу ард түмэндээ өгье гэж бодсон юм. Бид өөрсдөө эх орныхоо эзэд нь болохгүй бол ядуу зүдүү хэвээрээ л байна. Одоо бүгдээрээ сэрье, хавар боллоо, сайхан цаг ирж байгаа шүү. Та бүхэндээ сайн сайхныг хүсье” гэв.
Шадар сайд асан Ц.Оюунбаатар “Өдрийн сонин”-д ярихдаа “Н.Энхбаяр дарга Ерөнхийлөгчийн сонгуульд нэр дэвшинэ” хэмээн мэдэгдсэн юм. “Өргөө” зочид буудалд 1.5 тэрбум төгрөгийн хөрөнгө оруулалт хийсэн гэж түүнийг буруутгаж байгаа. Тэр нь одоо орон нутгийн өмч хэвээрээ байгаа. Талбайн хажуу талын газар ч ялгаагүй Улаанбаатар хотын өмчид бүртгэлтэй. Гэмт хэрэг байхгүй. Монгол Улсын эрүүгийн хуульд байхгүй зүйл. Тийм болохоор цагаатах болно. Манай намын даргын хувьд ялтайд тооцох хугацаа гэж зүйл яриад байдаг. Тэр асуудлыг хуулиар шийдээд дуусчихсан. Эрх мэдэлтэй улс төрийн хүчнийхэн эрх мэдэлгүй байгаа өрсөлдөгчөөсөө айсандаа ингэж буруутгадаг.
УИХ-ын гишүүн Х.Тэмүүжин нэг удаа Н.Энхбаяр төрийн алба хашихад саад байхгүй гэж хэлсэн. Гэтэл цаанаас нь дарамт шахалт үзүүлээд дахиж тийм зүйл ярих хэрэггүй гэсэн байх. Чамайг харсаар байтал чинь эмэгтэй хүн байхад эрэгтэй гэж ярьж, хэлсээр байгаад эмэгтэй хүн биш гэсэн бичиг хийвэл яах вэ” хэмээн ярилцлага өгсөн юм.
О.ӨНӨР