УИХ-ын Эдийн засгийн байнгын хороон өнөөдрийн хуралдаанаар, Монголбанкны ерөнхийлөгч Н.Баяртсайханыг албан тушаалаас нь чөлөөлөх эсэх асуудлыг хэлэлцэж, дэмжлээ.
Монгол Улс 2017 онд FATF-ын “саарал жагсаалт”-д орох эрсдэл үүсэж, тодорхой зөвлөмж биелүүлэхийг шаардсан. ЭЗБХ-ны энэ оны зургаадугаар сарын хуралдаанаар, тус байгууллагын зөвлөмжийг Монголбанк хангалтгүй биелүүлсэн гэж дүгнэжээ. Тиймээс Төв банкны тухай хуулийн 26.6 дугаар зүйлийн 4 дэх хэсэгт “үүрэгт ажлаа хангалтгүй биелүүлсэн” бол Монголбанкны удирдлагыг чөлөөлөхөөр заасныг үндэслэж Н.Баяртсайханыг Монголбанкны ерөнхийлөгөөс чөлөөлөх саналтай байгаагаа УИХ-ын дарга Г.Занданшатар танилцуулав.
Хэлэлцэж буй асуудалтай холбогдуулан гишүүд асуулт асууж хариулт авсны дараа санал хураахад, УИХ-ын даргын саналыг гишүүдийн олонх дэмжиж, Монголбанкны ерөнхийлөгч Н.Баяртсайханыг албан тушаалаас нь чөлөөлөх тогтоолын төслийг чуулганы нэгдсэн хуралдаанд танилцуулахаар тогтов. Тогтоолын төслийг баталсан өдрөөс дагаж мөрдөх юм.