Он гарсаар мотоциклийн ослын улмаас 18 хүний амь нас хохироод байна. Манай орны хувьд цаг агаар дулаарахад замын хөдөлгөөний нөхцөл байдалд өөрчлөлт ордог онцлогтой.
Тухайлбал, хүүхэд, залуус дугуй болон мотоцикльтой замын хөдөлгөөнд оролцдог. Энэ нь зам тээврийн осолд өртөх, цаашлаад эрүүл мэнд, амь насаараа хохирох явдлыг өсгөх хандлагатай байдаг.
Ялангуяа орон нутагт мотоцикльтой хөдөлгөөнд оролцож осолд өртөх нь нийслэлээс хэд дахин их. 2014 онд мотоциклийн ослын улмаас нийт 143 хүний амь нас хохирч, үүний найм нь нийслэлд, үлдсэн нь орон нутагт гарчээ. Өнгөрсөн онд 81 хүн амь насаа алдсан байна. Өмнөх онтой харьцуулахад бууралттай байгаа ч энэ төрлийн осол гарсаар байгаа юм.