ОХУ-д ажиллаж, сурч хөдөлмөрлөж байгаа монгол иргэд 2017 оны Монгол Улсын Ерөнхийлөгчийн сонгуульд саналаа өгөхийн тулд урьдчилан бүртгүүлэх ёстойг ОХУ дахь ЭСЯ-аас анхаарууллаа.
Бүртгэл 5 дугаар сарын 1-ээс 20-ны өдрийг дуустал Бямба, Ням гаригуудыг оролцуулан 8:30-12:30, 13:30-17:30 цагийн хооронд ЭСЯ-ны Консулын хэлтсийн байранд хийгдэж буй аж.
Саналаа өгөхөөр бүртгүүлэх иргэн иргэний шинэчилсэн бүртгэлд хамрагдсан байх ба санал авах өдөр буюу 6 дугаар сарын 10-ны өдрөөс өмнө 18 нас хүрсэн байх шаардлагатай юм.
Түүнчлэн ЭСЯ-ны www.embassymongolia.ru цахим хуудаснаас СЕХ-оос баталсан “Монгол Улсын Ерөнхийлөгчийн ээлжит сонгуульд оролцох гадаад улсад байгаа иргэний бүртгүүлэх маягт”-ыг татаж авч бөглөн гарын үсгээ зурж баталгаажуулан, гадаад паспортын хуулбарын хамт тус ЭСЯ-ны Консулын хэлтсийн байранд өөрийн биеэр авчирч өгөх эсхүл ЭСЯ-ны шуудан болон факсаар илгээн бүртгүүлэх боломжтой ажээ.
Бүртгэл нь баталгаажсан иргэд саналаа өгөхөөр ирэхдээ гадаад паспорт, иргэний үнэмлэхийн аль нэгийг заавал авчрах шаардлагатайг ОХУ дахь ЭСЯ-аас анхааруулаад тус улсад оршин суугаа монголчууддаа төрийн тэргүүнээ сонгох сонгуульд идэвхитэй оролцохыг уриаллаа хэмээн МОНЦАМЭ-гийн Москва дахь сурвалжлагч мэдээллээ.