Монгол Улсын Үндсэн хуулийн Цэц, Бүгд Найрамдах Турк Улсын Үндсэн хуулийн шүүх хооронд Хамтын ажиллагааны тухай санамж бичигт Анкара хотноо гарын үсэг зурав.
БНТУ-ын Үндсэн хуулийн шүүх байгуулагдсаны 55 жилийн ойн арга хэмжээ Анкара хотноо болж, олон улсын бага хурал зохион байгуулсан юм. Тус бага хуралд Монгол Улсын Үндсэн хуулийн Цэцийн даргын үүрэг гүйцэтгэгч Н.Жанцан, гишүүн Д.Одбаяр нар оролцсон байна.
Мөн арга хэмжээнд ХБНГУ, ОХУ, Испани, Итали улс зэрэг нийт 30 орны Үндсэн хуулийн шүүх болон олон улсын шүүхийн байгууллагуудын төлөөлөгчид оролцож, Үндсэн хуулийн шүүхээс үндсэн эрхийг сахин хамгаалах асуудлаар хэлэлцүүлэг хийж, туршлага солилцжээ.
Энэ үеэр хоёр улсын Үндсэн хуулийн цэц, Үндсэн хуулийн шүүх хоорондын хамтын ажиллагааг өргөжүүлэх зорилгоор дээрх санамж бичгийг байгуулж, гарын үсэг зурсан байна.