“Монгол шуудан” ТӨХК-ийн захирал Ц.Батсайханыг үндэслэл, шалтгаангүйгээр хууль бусаар ажлаас нь халсан гэж компанийнх нь ажилчид эсэргүүцэж суулт зарлаад байна. Тус компанийн ажилчид яг одоо “Монгол шуудан”-гийн байрны нэгээс гурван давхар хүртэл суулт зарлаад байна. Тэд“Шуудан төрийн тоглоом биш”, “Гадны хүн шууданд хэрэггүй”, “Шударга бус байна”, “Монгол шуудан албан тушаалын наймаа биш”, “Шууданд ашиг сонирхол хэрэггүй” гэсэн лоозон барьжээ. ТӨХ өргөх бичигт нь хариу өгөхгүй бол өдөржингөө суулт зарлахаар болжээ. Тус компанийн хуучин захирал Ц.Батсайхан томилогдоод удаагүй байгаа Т.Дуламдорж нар өнөөдөр “Монгол шуудан” дээр ирсэн ч суулт зарласан ажилчид оруулалгүй буцаасан юм.
Тус компанийн ажилтан Болортуяа “Бид Батсайхан гэж хүнийг хамгаалж байгаа юм биш. Өөрсдийнхөө эрх ашгийг л хамгаалж байна. Шинэ захирлыг дагаад удирдлагын баг өөрчлөгдөнө. Удирдлагын баг өөрчлөгдөхөөр бүх ажил шинээр эхэлнэ. Хэрэгжиж эхэлсэн ажлууд хойшлох эрсдэл гарч ирнэ. Тэгээд ч шинэ захирал шуудангийн талаар ямар ч мэдлэггүй хүн. Өмнөх удирдлагын эхлүүлсэн зөв ажлуудыг үргэлжүүлэх чадваргүй” гэж ярилаа. ТӨХ өргөх бичигт нь хариу өгч, ямар нэг арга хэмжээ авахгүй бол “Монгол шуудан”-гийн ажилчид улс даяар ажил хаялт зарлахаар төлөвлөжээ.
