Хөгжмийн зохиолч, хөгжмийн найруулагч, продюсер Б.Чинбат өөрийн шинэ уран бүтээлийн нээлт болгож “Миний аялсан 1000 хот” хэмээх хөгжмийн шинэ бүтээлээ үзэгч, сонсогчдын хүртээл болгож байна.
Тэрээр шинэ уран бүтээлийнхээ тухай ярихдаа, “Уран бүтээлийг минь үргэлж дэмжиж, урам хайрладаг үзэгч, сонсогч, фэнүүддээ зориуллаа. Энэхүү хөгжмийг тун удахгүй “VTV”-ээр гарах дэлхийн 1000 хотоор аялж, газар бүрийн гоё сайхныг харуулж, мэдрүүлэх шинэ нэвтрүүлгийг бүтээж буй, аялагч Оюунчимэг санаачилж, нэвтрүүлгийнхээ сүлд дуу болгосон. Дэлхийг тойрсон 1000 хотын сонин сайхан болгоныг Монголчууд бидэнд хүргэх гэж байгаад баяр, талархалтай байна. Аялал гэдэг бидэнд маш олон зүйлийг өгдөг. Дэлхийн өөр өөр соёлуудтай танилцаж, шинэ найзуудтай болж магадгүй тэднээс суралцдаг. Хол газар явахдаа гэр бүлээ ямар үнэ цэнэтэйг ухаарч ойлгох, өөрийгөө олох олон шинэ мэдрэмж, туршлагыг суулгаж байдаг билээ. Аялалын тухай тэр дундаа дэлхийн гайхамшигт хотуудыг нүдэндээ харж, чихэндээ сонсч, зүрхэндээ мэдэрсэн аялгуу эгшигээр та бүхнээ хөглөе. Аз жаргалтайгаар сонсож бас аялцгаая” хэмээн ярьсан юм.
Дашрамд сонирхуулахад, хөгжмийн зохиолч Б.Чинбат ирэх намар буюу есдүгээр сарын 21, 22, 23-нд бие даасан томоохон хэмжээний шинэ тоглолтоо тавихаар бэлтгэл ажилдаа ороод байгаа юм.