МАН-аас Монгол Улсын Ерөнхийлөгчийн сонгуульд нэр дэвшиж буй М.Энхболдын талаар тараагдаж буй мэдээлэлтэй холбогдуулан түүний сонгуулийн штаб, Нийгмийн ардчилал Монголын залуучуудын холбооноос мэдээлэл хийлээ.
Тэд ярихдаа “Сонгуулийн сурталчилгаа зарласан өдрөөс эхлэн нэр дэвшигчийг элдвээр гүтгэж ирлээ. Тухайлбал 60 тэрбумын бичлэг эвлүүлэг биш гэж олон түмнийг төөрөгдүүлсэн мэдээлэл тарааж байна. Энэ нь нэр дэвшигчийн нэр алдарт халдахаас авахуулаад олон мянган сонгогчийг маань доромжилж байна. Сонгууль бүрээр 60 тэрбумын энэ хар пи ар гарч ирдэг. Тиймээс энэ асуудалд цэг тавин шүүхийн байгууллагаар шалгуулахаар боллоо. Манай сонгогчид дэмжигчдээс өнгөрсөн хугацаанд энэ асуудлыг шалгуулаач гэж шаардаж ирсэн ч бид хууль хяналтын байгууллагын үйл ажиллагаанд хөндлөнгөөс оролцохгүй өдий хүрсэн. Харамсалтай нь Х.Баттулга гурван сонгууль дамнуулан энэ асуудлыг сөхөж тавьж байгаа учир бид ч бас сөргүүлэн яагаад шалгуулж, үүнийг шийдвэрлэж өгөхгүй байгаа талаар асуулга явуулна. Ерөнхийлөгчийн сонгуулиас өмнө үүнийг нэг шийдвэрлэх ёстой гэж бодож байна.
Мөн Х.Баттулгатай холбоотой хэргийг яагаад шалгахгүй байгаа талаар хэрэг нь ямар шатандаа явж байгаа вэ, энэ хүн сэжигтэн юм уу, яллагдагч юм уу гэдгийн эргэлзээг тайлж өгөөч ээ гэж ҮАБЗ болон Шүүх, Цагдаад хүсэлт тавихаар одоо явах гэж байна. Тэрээр 267 км төмөр замыг бариулна гэж 720 тэрбум төгрөгийг завшсан” гэв.
О.ӨНӨР