УИХ дахь МАН-ын бүлэг өчигдөр хуралдаж хэд, хэдэн асуудлын хүрээнд хуралдсан байна. Энэ долоо хоногийн чуулганаар Өрийн удирдлагын тухай хууль, 2014 оны Төсвийн хүрээний мэдэгдэлээр Монгол Улсын өрийн таацыг нэмэгдүүлэх тухай орж ирэх гэж байгаа. Энэ асуудал дээр тус намын бүлэг онцлон ярилцсан гэнэ. Өнөөдөр Монгол Улсын иргэн бүр дөрвөн сая төгрөгийн өртэй байгаа бол Засгийн газрын өргөн мэдүүлснээр баталбал таван сая 84 мянган төгрөгийн өртэй болно түүний дараа жил иргэн бүр 6.4 сая төгрөгийн өртэй болно гэдгийг Ардын намынхан мэдэгдсэн юм. Өрийн таацыг нэмэгдүүлбэл энэ онд Засгийн газар 6.1 их наяд төгрөгийн зээл авах боломж нээгдэнэ. Дараа жил 2.8 их наяд төгрөгийн зээл авах бол 2016 онд 2.2 их наяд төгрөгийн зээл авах боломж бүрдэх юм байна. Өнөөдрийн зээлтэйгээ нийлүүлбэл дөрвөн жилийн хугацаанд 19.3 их наяд төгрөгийн өрөнд оронд гэдгийг бүлгийн дарга С.Бямбацогт мэдэгдлээ. Өмнө авсан зээлээрээ дорвитой зүйл хийгээгүй тул Өрийн удирдлагын тухай хуулийг дэмжихгүй гэдэг байр суурь нэгджээ. УИХ зөрчилтэй хуулийг баталж болохгүй. Төсвийн тухай хууль Төсвийн тогтвортой байдлын тухай хуулийг өмнө нь баталсан хирнээ үүнтэйгээ зөрчилдсөн хуулийг батлах гэж байгааг хэлсэн юм. Хууль зөрчдөг хууль баталдаг парламенттай, хуулиа уландаа гишгэдэг Засгийн газартай болчихвол аж ахуй нэгжүүд хууль биелүүлэх шаардлага байна уу гэв.
Сүүлийн үед гэмт хэргийн нөхцөл хүндэрч байгааг онцлоод өнгөрөгч долоо хоногт гарсан аймшигтайгаар амиа алдсан хоёр бүсгүй, цэргийн албан хаагч амиа алдсан болон аав нь хоёр хүүгээ машинд шатаасан, гэм буруу нь тогтоогоогдоогүй иргэн амиа алдсан тул эдгээрт холбогдох албаны хүмүүсийг байлцуулан бүлгийн хуралдаан дээрээ мэдээлэл сонсчээ. Гэм буруу нь тогтоогдоогүй хүмүүсийг хорьж байгаа нь хүний эрхийг зөрчсөн явдал гэдгийг онцолсон юм. Тиймээс бүлгийн гишүүд цаашид анхаарна гэв. УИХ дахь Хүний эрхийн дэд хороо, УИХ-аас томилогддог Хүний эрхийн үндэсний комиссынхон ажлаа хийхийг шаардана гэдгээ бүлгийн дарга илэрхийлэв. Энэ долоо хоногт Газрын тухай хуулийг хэлэлцэх хуулийг Засгийн газар эргүүлэн татаж авах хэрэгтэй гэдэг дээр санал нэгджээ. Учир нь уг хууль нь Үндсэн хуулийн дараа хэлэлцэгдэх хэмжээний язгуур хууль тул ард түмнээс санал авах шаардлагатай гэдгийг УИХ-ын гишүүн Ж.Энхбаяр мэдээлсэн юм.
Э.ЭНХ