Яг одоо хаалттай байдлаар үргэлжлэн хуралдаж буй МАН-ын Бага хурал түр завсарлага авах гэж байна. Энэ удаагийн Бага хурлаар таван асуудал хэлэлцэх бөгөөд тэдгээрээс олны анхаарлыг татаж буй сэдэв нь Засгийн газрын шинэ тэргүүн хэн байх вэ гэдгийг тодруулах юм. МАН-ын Бага хурал хуралдаж эхэлсэн цагаасаа хойш намын дарга М.Энхболдын улстөрийн илтгэл, Хяналтын хорооны дүгнэлт, намын дотоод дүрмийн асуудлаа хэлцэж байгаа юм.
Бага хурлын гишүүдийн зүгээс намын дүрэмтэй холбоотой байр сууриа яг одоо илэрхийлж байна. МАН-ын Бага хурал 19 цагт түр завсарлах юм. Шинээр томилогдох Ерөнхий сайдын санал хураалт, хэлэлцэх таван асуудлын хамгийн сүүлд байна. Юутай ч намын дүрмээ ярилцсаны дараа Ерөнхий сайдын нэрийг тодруулах санал хураалт 23 цагийн үед эхлэх төлөвтэй байгааг зарим эх сурвалжууд өглөө.
Зарим гишүүдийн зүгээс Ерөнхий сайдын нэрийг тодруулах асуудлаа маргааш хэлэлцэх саналтай байгаа бол нөгөө хэсэг нь нэгэнт тодруулах ёстой тул өнөө шөнө хүртэл хуралдсан ч зүгээр гэж байв. Ө.Энхтүвшин, У.Хүрэлсүх, Н.Энхболд хэмээх гурван нэр дэвшигчийн хувьд 50+1 хувийн санал авсан нь дараагийн Ерөнхий сайдаар томилогдох боломжтой болно. Бага хурлын гишүүдийн хэлж буйгаар хоёр удаагийн санал хураалт явагдана гэж байлаа. Учир нь гурван нэр дэвшигчийн хувьд хамгйин өндөр санал авлаа гэхэд 50 +1 хүрэхгүй тул дараагийн шатны санал хураалтад хамгийн өндөр санал авсан хоёр нэр дэвшигчийн дунд дахин санал хураалт явуулж магадгүй байгаа юм байна.
Э.МӨНХ
Э.ЭНХ