Украины зүүн хэсгийн нутагт пуужинд оногдон сүйрсэн Малайзын Боинг 777 онгоцны сэгийг цуглуулж, зөөвөрлөх ажил энэ сард эхэлсэн. Донецкийн ардын улсыг тунхагласан Оросыг дэмжигчид Нидерландын мэргэжилтнүүдтэй хамтран Грабов тосгоны ойролцоогоос сүйрсэн онгоцны сэгийг цуглуулж дуусаад өчигдөр /ХI.23/ Харьков хот руу галт тэргээр зөөвөрлөсөн байна. Боинг 777 онгоцны сэг галт тэрэгний 12 чингэлэг болсон байна. Нисэх онгоцны сэгийг Харьков хотод төвлөрүүлсэний дараа Нидерланд улс руу авч явах аж. Малайзын МН17 нислэг өнгөрсөн долдугаар сарын 17-нд Украины нутагт сүйрснээс 298 хүн амь үрэгдсэн билээ.