Үндэсний статистикийн хорооноос орон даяар мал тооллогыг жил бүрийн арванхоёрдугаар сарын эхээр, өвлийн идэш бэлтгэж дууссаны дараагаар зохион байгуулдаг билээ. Тэгвэл энэ жилийн мал тооллого өчигдөр эхэлж, 17-ны өдөр өндөрлөх аж. Малтай өрх, аж ахуй нэгжийн бүртгэл тооллогын ажлын чанарыг сайжруулах зорилгоор бүртгэлийг онлайнаар явуулахаар төлөвлөжээ. Ийнхүү тооллогын мэдээллийг аймаг, сумаас онлайн систем ашиглан боловсруулж нэгтгэснээр дүн мэдээг шуурхай гаргах юм байна.
Мал тооллого эхэлсэнтэй Хэнтий аймгийн Хэрлэн сумын Засаг даргын хүн ам өрхийн мэдээллийн санг шинэчилж, хашаа худаг, мал тэжээвэр амьтдын тооллого явуулах тухай захирамж гаргажээ. Сумын хэмжээнд тооллогын ажлыг зохион байгуулах, дүн мэдээг гаргах, зэргэлдээ сумын нутагт өвөлжиж байгаа тус сумын айл өрхийн хүн ам, өрхийн мэдээллийн санг баяжуулах хашаа худгийн судалгаа авах зургаан ажлын хэсэг байгуулан заасан чиглэлийн дагуу хөдөөгүүр ажиллаж байна. Мөн сумын төвд айл өрхийн хашаа худаг, мал, тэжээвэр амьтдын тооллого хүн ам өрхийн мэдээллийн санг баяжуулах ажлыг явуулах салбар ажлын хэсэг ажилдаа орсон байна. Сумын Засаг даргын захирамжийн дагуу энэ сарын тавны өдрөөс эхлэн 17-ны өдрийг хүртэл мал тууварлах, нядлах, малын мах зөөвөрлөхийг түр зогсоож, малын шилжилт хөдөлгөөн хийх, түүхий эд тээвэрлэхийг бүрэн зогсоожээ.