Засгийн газрын ээлжит хуралдаанаас гарсан шийдвэрийг Хүнс хөдөө аж ахуй хөнгөн үйлдвэрийн сайд З.Мэндсайхан танилцууллаа.
“Засгийн газраас төв суурин газрын иргэдийн хүнсний нөөц бүрдүүлэх чиглэлд түлхүү анхаарч ажиллах шийдвэр гаргалаа. Энэ ажлын хүрээнд махны нийлүүлэлтийг нэмэгдүүлэх зорилгоор Улаанбаатар хотод 30-аас доошгүй цэгт ил задгай болон агуулахын худалдаа гаргана. Энэ долоо хоногт багтаан байршлыг тодорхой болгох юм. Цэг байгуулж байгаагийн учир нь Улаанбаатар хотын хоёр талд бэлтгэж байгаа махыг цөөхөн худалдааны төвүүдээр зах зээлд нийлүүлдэг тул төвлөрлийг сааруулахаар дээрх шийдвэрийг гаргасан юм. Иргэд өвлийн идэшээ базаадаг үе эхэлж байна. Энэ жил өвөлжилт хүндрэх төлөвтэй байгаан дээр шүлхий өвчин гарсантай холбоотойгоор аймгуудаар малын шилжилт хөдөлгөөнийг хориглож, махны экспортыг түр хугацаанд хязгаарласан. Иймд махны бизнес эрхлэгчид, малчид малаа эдийн засгийн эргэлтэд оруулж эдгээр төвүүдээр дамжуулан нийлүүлэлт хийхийг хүсье” гэлээ.