Монгол Улсын Шадар сайд Ц.Оюунбаатарын албан өрөөнд Авлигатай тэмцэх газрын дөрвөн хүн өнөөдөр зөвшөөрөлгүй дайрч орж иржээ. Тэрбээр энэ талаар мэдэгдэл хийлээ. Ц.Оюунбаатар“Төрийн ордон бол зөвшөөрөлтэй хүмүүс бичиг баримтаа шалгуулан орж ирдэг улсын онцгой обьект. Хууль бусаар дайрч орж ирж, ямар нэг бичиг баримт үзүүлээгүй. Энэ бол Монгол Улсын холбогдох хууль тогтоомжийг зөрчиж байгаа үйлдэл мөн” гэв. МАХН-ын дарга Н.Энхбаярыг хайж АТГ-ын хүмүүс ийн ордонд нэвтэрчээ. МАХН-ын дарга Н.Энхбаяраас Авлигатай тэмцэх газар тайлбар авахаар түүнийг удаа дараа дууджээ. Гэвч тэрбээр АТГ-т очоогүй байна. Мөн МАХН-ын Ерөнхий нарийн бичгийн дарга асан Г.Шийлэгдамбын хэрэг дээр ажиллаж буй мөрдөн байцаагч Н.Энхбаярыг албадан байцаахаар болсон гэх мэдээлэл байна. Уг асуудлыг эсэргүүцсэн МАХН-ын зарим гишүүд, дэмжигчид одоо Төрийн ордны баруун хаалган дээр цугларчээ.
