МАХН-ын Бага хурал УИХ-ын гишүүн асан С.Ганбаатарыг Ерөнхийлөгчийн сонгуульд нэр дэвшүүлэхээр болжээ. Тус нам Н.Энхбаярын дараа хэнийг дэвшүүлэх вэ гэдэг олны анхаарлыг татаж байсан юм. Тэгвэл Бага хурлын гишүүдийн 65 хувийн саналаар С.Ганбаатар нэр дэвшүүлэхээр болжээ. Мөн тэрээр өнөөдөр хурлын үеэр тус намд элссэн байна.
Өмнө нь Сонгуулийн ерөнхий хороо МАХН-ын дарга Н.Энхбаярыг Ерөнхийлөгчид нэр дэвшигчээр бүртгэхээс татгалзсан. Ингэснээр МАХН өнөөдөр 24.00 цагаас өмнө дараагийн нэр дэвшигчээ тодруулж, бүртгүүлэх шаардлагатай болоод байсан юм.
Тэгвэл тус шийдвэрийн дараа УИХ-ын гишүүн О.Баасанхүү өөрийн байр сууриа илэрхийллээ.
Тэрээр, “Би С.Ганбаатарыг МАХН-аас нэр дэвшихийг эсэргүүцэж байна. МАХН 114 мянган гишүүд дэмжигчтэй. Энэ том намыг дээд боловсролтой эсэх нь ч тодорхойгүй хүн төлөөлж болохгүй. Би МАХН-ыг төлөөлж УИХ-д байгаа ганц суудлын гишүүн нь. Би УИХ-ын гишүүнийхээ албан бичгийг маргааш Сонгуулийн ерөнхий хороонд хүргүүлж, С.Ганбаатарыг эсэргүүцэж байгаагаа илэрхийлнэ. Намайг намаасаа гарах нөхцөл байдал руу МАХН-ын одоогийн удирдлагууд түлхэж байна” гэлээ.
О.ӨНӨР