Монголын Улсын Ерөнхийлөгчийн ээлжит сонгууль ирэх зургадугаар сарын 26-нд болно. Энэхүү сонгуульд намуудаас нэр дэвшигчид тодорч байна. МАН-аас намын дарга М.Энхболдыг нэр дэвшүүлэхээр болсноо албан ёсоор мэдэгдсэн бол АН-ын хувьд нийт гишүүдээсээ санал асуулга авч, хамгийн өндөр оноо авсан Х.Баттулгыг Их хурлаараа батламжлахаар болоод байна.
Тэгвэл МАХН-аас нэр дэвшигч маргааш тодрох бололтой. Өнөөдөр үдээс хойш Гүйцэтгэх товчоо нь хуралдах чигтэй байгаа бөгөөд маргааш 10:00 цагт Бага чуулганаа товлоод байгаа аж. Бага чуулганаараа Ерөнхийлөгчид нэр дэвшигчээ шийдэх бөгөөд одоогоор хэн, хэний нэрийг Бага чуулган руу оруулах вэ гэдэг асуудал тодорхой яригдаагүй байгаа бололтой.