БНСУ-ын Чунчон мужид энэ сарын 2-ны өдөр эхэлсэн “Korea Open 2017” олон улсын нэр хүнд бүхий тэмцээнд Монголын таеквондогийн үндэсний шигшээ багийн тамирчин М.Түмэнбаяр -58кг жинд хүч үзэн алтан медаль хүртлээ. Тэрбээр хэсгийн тоглолтуудад БНСУ-ын шилдэг дөрвөн тамирчинг хожиж, шигшээ тоглолтод Япон улсын шилдэг тамирчинг хожсоноор жиндээ аваргалжээ. Мөн Монголын үндэсний шигшээ багийн дасгалжуулагч, багш Hur Inyon шилдэг дасгалжуулагч болов. Түүний жинд нийт 59 тамирчин хүч үзсэн юм. Энэхүү алтан медаль нь насанд хүрэгчдийн ангилалд авч Монгол Улсын анхны алтан медаль болж Монголын таеквондогийн спортын түүхэнд нэгэн шинэ хуудсыг нээлээ. Таеквондогийн спорт нь Солонгос улсаас үүсэлтэй гэдгийг сонирхогчид мэдэх биз. Тийм ч болохоор энэ спортоор Солонгосчууд дэлхийд тэргүүлдэг. Ийм хүчтэй орны тамирчдыг ялж, аварга болсон нь түүхэн үйл явдал хэмээн М.Түмэнбаярын багш дасгалжуулагчид ярьж байна.
Уг тэмцээн нь G2 ангиллын буюу Олимп, дэлхийн чансааны өндөр оноо олгодог тэмцээн бөгөөд дэлхийн 70 гаруй орны 3000 гаран тамирчин оролцож байна.
Э.МӨНХ