-Харин Н.Номтойбаяр өргөдлөө өгч, НАМЗХ-ны ерөнхийлөгчийн үүрэг гүйцэтгэгчээс чөлөөлөгджээ-
МАН-ын дэргэдэх Нийгмийн Ардчилал Монголын Залуучуудын Холбоо/НАМЗХ/-ны VII бага хурал өчигдөр болж байгаа талаар бид өмнө нь мэдээлсэн. Тус бага хурал өчигдөр бүтэн өдрийн турш хуралдаж, Л.Оюун-Эрдэнийг үүрэгт ажилд нь хэвээр үлдээж, тус холбооны ерөнхийлөгчийн үүрэг гүйцэтгэж байсан Н.Номтойбаяр өөрийн хүсэлтээр ажлаа өгснөөр сүүлийн хэдэн өдөр маргаан дагуулж байсан асуудал нэг тийшээ болжээ.
Дээрх шийдвэрт хүрэхийн өмнө талуудын дунд ширүүн маргаан болсон гэх эх сурвалжийн мэдээлэл байна.
Мөн хуралдаанаар НАМЗХ-ны ерөнхий нарийн бичгийн дарга Б.Бат-Эрдэнэ өөрийн хүсэлтээр ажлаа өгч, Уул уурхайн дэд сайд Г.Тэмүүлэнг оронд нь томилжээ.
Харин ирэх зургадугаар сарын 20-нд НАМЗХ-ны V ээлжит их хурлыг хуралдуулах шийдвэр гаргасан байна.