Ерөнхий сайдын ахлах зөвлөх Л.Гансүхийг АТГ-аас эрүүгийн хэрэг үүсгэн баривчлаад багагүй хугацаа өнгөрч байна. Цагдан хорих 461-р ангид арав гаруй хоногийн өмнөөс өлсгөлөн зарлаад байгаа Л.Гансүхийн батлан даалтад гаргах эсэхийг өнөөдөр Дүүргийн эрүүгийн хэргийн нэгдүгээр шүүхэд хэлэлцэнэ. Л.Гансүх болон түүнтэй хамт хоригдсон М.Тулга нарын цагдан хорих хугацааг сунгах эсэхийг өчигдөр хэлэлцээд М.Тулга нарыг үргэлжлүүлэн хорихоор шийдвэрлэсэн бол Л.Гансүхийн өмгөөлөгч Улсын дээд шүүхэд хурал давхацсан учраас хойшлуулах хүсэлт гаргажээ. Энэ хүсэлтийг шүүх бүрэлдэхүүн хүлээн авч Л.Гансүхийн цагдан хорих хугацааг сунгах эсэх шүүх хурлыг нэг өдрөөр хойшлуулсан байна. Тиймээс өнөөдөр Дүүргийн эрүүгийн хэргийн нэгдүгээр шүүхэд Л.Гансүхийн асуудлыг тусад нь хэлэлцэхээр болжээ.