“Шинэ эхлэл” лаборатори сургуулийн захирал Л.Эрдэнийг авлигын хэргээр АТГ-ын Мөрдөн шалгах хэлтсээс баривчилсан тухай мэдээлж байсан. Кембрижийн хөтөлбөрийн дагуу сургалт явуулдаг тус сургуулийн захирлыг Эрүүгийн хуулийн 22.4-т заасан бусдаас хахууль авсан гэх үндэслэлээр яллагдагчаар тооцон шалгаж эхэлсэн юм. Энэ сарын 10-нд түүнийг цагдан хорьсон бөгөөд 48 цаг саатуулах хугацаа нь өнгөрсөн баасан гарагт дуусчээ. Үргэлжүүлэн хорьж шалгах шаардлагатай хэмээн АТГ-ын Мөрдөн шалгах хэлтсээс Нийслэлийн прокурорын газарт хүсэлтээ уламжилсны дагуу хяналтын прокурорууд Баянгол дүүргийн Эрүүгийн хэргийн анхан шатны шүүхэд яллагдагчаар тооцон 30 хоног цагдан хорих санал хүргүүлжээ. Харин тус шүүхийн шүүгч “Л.Эрдэнийг цагдан хорих шаардлагагүй” хэмээн батлан даалтад гаргах захирамж гаргасан аж.