БНАСАУ-ын удирдагч Ким Жөн Ун ОХУ-ын Ерөнхийлөгч Владимир Путинтэй уулзахаар тус улсын Алс Дорнодын Владивосток хотноо хийсэн айлчлалын талаарх баримтат кино БНАСАУ-ын төв телевизээр гарчээ. Ням гарагийн орой Солонгосын төв телевизээр гарсан 50 минутийн баримтат кинонд хоёр орны бат бөх харилцааг онцолсон байна.
“Ким Жөн Уны ОХУ-д хийсэн айлчлал нь нөхцөл байдал өөрчлөгдөж буй шинэ эриний хэрэгцээ шаардлагад нийцэж, уламжлалт, нөхөрлөлийн харилцааг бэхжүүлэх түүхэн арга хэмжээ боллоо. Энэхүү уулзалт нь БНАСАУ, ОХУ-ын эв санааны нэгдлийн түүхэнд үргэлжид гэрэлтэх болно” гэж баримтат кинонд тэмдэглэжээ.
Уг кинонд хоёр орны удирдагчийн дөрвөн цаг орчим үргэлжилсэн дээд хэмжээний уулзалтын үеэр хэлэлцэх чухал асуудлуудын нэг болох цөмийн зэвсгийн тухай огт дурдаагүй байна.
“KCNA” агентлагийн мэдээлснээр, Солонгосын хойгт энх тайван, аюулгүй байдлыг цогцлоох нь Вашингтоны цаашдын хандлагаас бүрэн хамаарна гэдгийг Ким Жөн Ун В.Путинтэй уулзах үеэрээ цохон тэмдэглэсэн ажээ.