Тулгар төрийн 2226, Их Монгол Улсын 811, Ардын хувьсгалын 96 жилийн ой, Үндэсний их баяр наадам өнөөдөр хязаалан насны морьдын уралдаанаар эхэллээ. Хязаалан морьдын уралдаанд төв орон нутгийн 300 гаруй хурдан хүлэг тоосоо өргөх юм. Хурдан хүлгүүд гарааны зурхайгаас 16 км замыг туулж барианд орно. Өнгөрсөн жилийн уралдаан 318 хурдан хүлэг тоосоо өргөж Дорнод аймгийн харъяат Т.Батзоригийн сартай хээр түрүү магнайд орж ирж наадамчин олноо баярлуулж байсан билээ.
Үндэсний их баяр наадмын хуульд долоогоос дээш насны хүүхэд хурдан морь унана гэж заасан байдаг. Түүнчлэн унаач хүүхдүүдийн аюулгүй байдлыг хангах хамгаалах хэрэгсэл, даатгалд хамруулсан эсэхэд зохион байгуулагчид хяналт тавин ажиллаж байна. Энэ жилийн хувьд Шадар сайдын зарлигаар эрлийз Монгол морьдыг ялган уралдуулж байгаагаараа онцлог юм.