Дональд Трампын засаг захиргааны зүгээс Хятадад үйлдвэрлэгдсэн гар утасны төхөөрөмжүүдийг АНУ-д худалдаалахыг хориглох талаар хэлэлцэж байгаа аж. Энэ тухай Wall Street Journal мэдээлсэн байна.
Эх сурвалжид дурдсанаар, Цагаан ордон үндэсний аюулгүй байдлын ашиг сонирхлын үүднээс хятадын харилцаа холбооны төхөөрөмжүүдийг импортлохыг хориглох тушаал гаргахаар бэлдэж байгаа гэнэ. Хориг арга хэмжээ ялангуяа Huawei болон ZTE компаниудыг хамрах бололтой.
Эдгээр компаниудын бараа бүтээгдэхүүнийг дэлхий даяар тархан байрлаж буй АНУ-ын цэргийн баазуудад ашиглахыг аль хэдийн хориглосон билээ. Эдгээр төхөөрөмжид суурилуулсан хэрэгслийн тусламжтайгаар хятадын тусгай албад мэдээлэл цуглуулах боломжтой хэмээн Америкийн тал болгоомжлоод байгаа аж.
Харин Huawei болон ZTE компаниудын зүгээс, тэд өөрийн хэрэглэгчдийн мэдээллийг тагнуулын байгууллагад хэзээ ч өгч байгаагүй хэмээн няцаасан юм.
Хятадад үйлдвэрлэсэн ухаалаг утсуудыг АНУ-д худалдаалахыг хориглох явдал нь тус хоёр орны хооронд өрнөөд буй худалдааны “дайнд” бас нэгэн нэмэр хачир болж магадгүй нь.
Америкаас экспортоор орж ирдэг олон төрлийн бараа бүтээгдэхүүнд 15-25% татвар оногдуулахаар Хятад улс шийдвэрлэсэн бөгөөд үүнд нь АНУ мөн “хариу барих” гэж байгаа бололтой.