БНХАУ-ын Ардын банктай байгуулсан 15 тэрбум юанийн своп хэлцлийн хугацаа ирэх онд дуусна. 5.8 их наяд төгрөг буюу манай улсын төсвийн талаас илүүтэй тэнцэх энэ мөнгийг төлөхүйц чадал манай эдийн засагт хараахан суугаагүй. Манайхны хүсэлтийн дагуу своп хэлцлийн хугацааг дахин гурван жилээр сунгах албан ёсны хэлэлцээр эхлүүлэхээр уулзалт товлосон ч Хятадын тал Монголын төлөөлөгчдийг хүлээж авалгүйбуцаасан гэсэн мэдээллийг баттай эх сурвалж өглөө.
Монголбанк БНХАУ-ын Ардын банктай анх 2011 онд үндэсний мөнгөн тэмдэгт солилцох своп хэлцлийг гурван жилийн хугацаатай, таван тэрбум юанийн дүнтэйгээр байгуулсан бөгөөд уг хэлцлийн мөнгөн дүнг 2012 онд хоёр дахин нэмэгдүүлж, 10 тэрбум юань болгосон. 2014 онд своп хэлцлийн хугацаа дуусахад гурван жилээр сунгаж, дахиад таван тэрбум юань нэмэн, 15 тэрбумд хүргэсэн юм. 2017 онд уг хэлцлийн хугацаа дуусах үед БНХАУ-ын зүгээс хугацааг дахин сунгахгүй гэдгээ мэдэгдсэн ч ОУВС-гийн хөтөлбөрт хамрагдах болсноор своп хэлцлийг 2020 оны долдугаар cap хүртэл үргэлжлүүлэх шийдвэрт хүрсэн юм.
Сангийн яам, Монголбанк ирэх онд БНХАУ-ын Ардын банкны своп хэлцлийн хугацааг сунгана гэж төлөвлөн, 960 тэрбум төгрөгийг зээлийн хүүд төлехөөр тооцож, эх үүсвэрийг төсөвт суулгасан. Хэрэв Хятадын тал своп хэлцлийн хугацааг сунгахаас татгалзвал Монгол Улс ирэх онд огт тооцоолоогүй их хэмжээний өрөнд унах юм.