Засгийн газрын хөтөлбөрийн дагуу төрийн байгууллагууд иргэдэд үйл ажиллагаагаа сурталчилан таниулах “Нээлттэй хаалганы өдөрлөг” зохион байгуулдаг уламжлалтай. Энэ дагуу Хууль зүйн яам өөрийн харьяа агентлаг байгууллагуудын хамт есдүгээр сарын бямба гаригт “Нээлттэй хаалганы өдөрлөг”-ийг Чингисийн талбайд зохион байгуулах гэж байна. Энэхүү өдрийг угтаж Хууль зүйн яам харьяа байгууллагуудынхаа дунд “Эрх чөлөөтөй Монгол хүн” 10 хоногийн аяныг зарласан байна.
Аяны хүрээнд иргэдэд нээлттэй үйлчилж, Эрх зүйн шинэчлэлийн хүрээнд өөрийн байгууллагад хийгдсэн шинэчлэл, өөрчлөлт, шинэ тутам нэвтрүүлсэн үйл ажиллагаа, болон шинээр батлагдан мөрдөгдөж байгаа хууль,журмуудын үйлчлэлийн талаар иргэдэд мэдээлэл хүргэх ажлыг идэвхижүүлэх зорилготой юм. Мөн нийгмийн хариуцлагаа ухамсарлаж алба хаагчид сайн дурын арга хэмжээнүүдийг ч зохион байгуулах нь нээлттэй. Шүүхийн шийдвэр гүйцэтгэх ерөнхий газар болон Хорих 411,Цагдан хорих 461 дүгээр ангийн нийт 150 гаруй албан хаагчид Цус сэлбэлт судлалын үндэсний төвөөс явуулж буй цус хандивлах “Амьдрал бэлэглэе” арга хэмжээнд нэгдсэн бол Хууль зүйн яамны алба хаагчид нэг өдрийн цалингаа Мөнгөн гүүр эмнэлэгт байрлаж буй улсын Түлэнхийн төвийн нэгдсэн эмнэлгийн үйл ажиллагаанд хандивлахаар шийдвэрлэжээ.